ŞƏXSİYYƏTLƏRİ - ELMLƏR NAMİZEDLERİ

ƏLİ ƏLİZADƏ

Əli Mahmud oğlu Əlizadə 1933-cü ildə Borçalı mahalının Bolus nümayəndəliyinin (Bolnisi rayonu) Faxralı kəndində kəndli ailəsində anadan olmuşdur.
1941-ci ildə Faxralı orta məktəbinin 1-ci sinfinə daxil olmuş, 1952-ci ildə həmin məktəbi bitirmişdir. 1952-ci ilin sentyabrından 1953-cü ilin sentyabrınadək Faxralı orta məktəbində pioner baş dəstə rəhbəri işləmişdir.
1953-cü ildə Azərbaycan Kənd Təsərrüfatı İnstitutunun baytarlıq fakültəsinə daxil olmuş, 1958-ci ildə həmin institutu bitirmişdir.
1958-ci ilin avqust ayından 1962-ci ilin sentyabrınadək Faxralı kəndindəki "Qələbə" kolxozunda baş baytar həkimi işləmişdir.
1962-ci ilin sentyabrında istehsalatdan ayrılmaqla mərhum professor Məhəmməd Əsəd oğlu Mehtiyevin rəhbərliyi altında tədqiqat aparmış, 1965-ci ildə namizədlik dissertasiyası müdafiə edərək biologiya elmləri namizədi elmi dərəcəsinə layiq görülmüşdür.
1965-ci ilin sentyabrından Kənd Təsərrüfatı Akademiyasında assistent, 1968-ci ildən isə dosent olmuşdur. 1979-cu ildən 1984-cü ilədək "yoluxmayan xəstəliklər və klinik diaqnostika" kafedrasında müdir, 1984-cü ilin sentyabrından 1987-ci ilin oktyabrınadək institutunun hazırlıq şö’bəsində müdir, 1987-ci ildən 1989-cu ilədək baytarlıq fakültəsinin dekanı olmuşdur.
Hazırda "terapiya, klinik diaqnostika və cərrahiyyə" kafedrasının müdiri işləyir. Əli Əlizadə 60-a yaxın elmi əsərin, o cümlədən 5 dərs vəsaitinin müəllifidir.
Əli Əlizadə 1965-ci ildən 2000-ci ilədək 20 ittifaq və respublika səviyyəli elmi konfranslarda çıxış edib, məqalələr çap etdirmişdir.

ƏLİ ƏLİYEV

Əli Bayram oğlu Əliyev 1923-cü il mayın 28-də Borçalı mahalının Bolus nümayəndəliyinin (Bolnisi rayonu) Faxralı kəndində anadan olmuşdur. 1941-ci ildə Faxralı orta məktəbini ə’la qiymətlərlə bitirmiş, həmin il hərbi xidmətə çağırılmışdır. 1943-cü ildə Hərbi Topçuluq məktəbini bitirmiş, zabit rütbəsi almış və 1945-ci ilədək İkinci Dünya müharibəsində faşistlərə qarşı vuruşmuşdur.
Əli Əliyev 1945-ci ildən başlayaraq Faxralı kəndindəki "Qələbə" kolxozunda mühasib köməkçisi, baş mühasib, ilk partiya təşkilatının katibi və kolxoz idarə hey’ətinin sədri vəzifələrində çalışmışdır .
Əli Əliyev 1955-ci ildə Tbilisi Dövlət Universitetinə (indiki TDU) daxil olmuş, 1960-cı ildə bitirmişdir. Təhsilini Azərbaycan Kənd Təsərrüfatı İnstitutunun (Gəncə şəhər) aspiranturasında davam etdirmiş və "Azərbaycan SSR-nin Şəki-Zaqatala zonasında ipəkçiliyin müasir vəziyyəti və inkişaf prespektivləri" mövzusunda namizədlik dissertasiyası yazmış və 1964-cü ildə həmin dissertasiyanı müdafiə edib elmlər namizədi olmuşdur.
Əli Əliyev 1964-cü ildə Bolnisi rayon Sovet İcraiyyə Komitəsinin sədri vəzifəsinə irəli çəkilmiş, bu vəzifədə 1972-ci ilədək işləmişdir. 1972-ci ildən ömrünün sonuna kimi Bolnisi rayon Meliorasiya və Su Təsərrüfatı İdarəsinə başçılıq etmişdir.
Əli Əliyev Qırmızı Əmək Bayrağı ordeni, "Əməkdə fərqlənməyə görə", "İgidliyə görə", "Stalinqrad müdafiəsi uğrunda", "Alamaniya üzərində qəlbəyə görə" və s. medallarla təltif edilmişdir.
Əli Əliyev 1945-ci ildən Sov.İKP-nın üzvü olmuşdur. O, Gürcüstan KP MK üzvülüyünə namizəd seçilmiş, dəfələrlə Bolnisi rayon partiya komitəsinin üzvü və rayon sovetinin deputatı olmuşdur. Əli Əliyevin elmi-pedaqoji fəaliyyəti 10 məqalədə öz əksini tapmışdr.
Əli Əliyev 1973-cü ildə vəfat etmişdir.

ƏLƏDDİN İMANOV

Ələddin Bayraməli oğlu İmanov 1938-ci ildə Borçalı mahalının Bolus nümayəndəliyinin (indiki Bolnisi rayonu) Faxralı kəndində anadan olmuşdur. 1946-cı ildə Faxralı kənd orta məktəbinin 1-ci sinfinə getmiş, 1957-ci ildə isə həmin məktəbi bitirmişdir. 1957-ci ildə Azərbaycan Dövlət Universitetinin fizika fakültəsinə daxil olmuş, 1962-ci ildə həmin fakültəni fərqlənmə diplomu ilə bitirmişdir. Həmin ildə tə’yinatla Moskva şəhərindəki Qapalı Ümumittifaq Elmi Tədqiqat Elektromexanika institutuna göndərilmişdir. O, burada elmi işlə məşğul olmuş, 1972-ci ildə dissertasiya işini müdafiə edib, fizika-riyaziyyat elmləri namizədi elmi dərəcəsi almışdır.
Ələddin İmanov elmin və texnikanın elə bir ixtisasına yiyələnmişdir ki, onun elmi əsərləri də qapalı jurnal və elmi kitablarda nəşr olunmuşdur. Onun işıq üzü görmüş əsərləri əsasən Moskva şəhərinin qapalı materiallar məcmuəsində çap olunmuşdur.
İşlədiyi bu müddətdə 4 ittifaq əhəmiyyətli ixtiranın və müəlliflik şəhadətnaməsinin müəllifi olmuşdur. O, bu şəhadətnamələri 1970,1978, 1980 və 1981-ci illərdə almışdır. Ələddin İmanovun ixtiraları SSRİ Kosmik Tədqiqatlar sahəsində istifadə edilmişdir.
Ələddin İmanov 1993-cü il yanvar ayında Bakı şəhərində vəfat etmişdir.

ƏMİRXAN BABAŞOV

Əmirxan Mehralı oğlu Babaşov 1947-ci il fevralın 5-də Bolnisi rayonunun Faxralı kəndində kəndli ailəsində anadan olmuşdur.
1954-cü ildə Faxralı kənd orta məktəbinin 1-ci sinfinə getmiş, 1965-ci ildə həmin məktəbin XI sinfini bitirmiş, 1965-ci ildə Azərbaycan Dövlət Universitetinin iqtisad fakültəsinə daxil olmuş, 1966-cı ildə iqtisad fakültəsi yeni təşkil edilmiş Azərbaycan Xalq Təsərrüfatı İnstitutuna verilmiş və 1969-cu ildə həmin institutun Əmtəəşünaslıq və ticarətin təşkili fakültəsini Fərqlənmə diplomu ilə bitirmişdir. Gənc mütəxəssis kimi bir müddət Ticarət Nazirliyi sistemində işləmiş, 1969-cu ilin oktyabr ayından 1971-ci ilin may ayına kimi Azərbaycan SSR Dövlət Plan Komitəsi nəzdində Elmi-Tədqiqat İqtisad İnstitutunda (ETİİ) kiçik elmi işçi vəzifəsində çalışmışdır. 1971-ci ilin may ayından 1972-ci ilin may ayına kimi hərbi xidmətdə olmuşdur.
1972-1975-ci illərdə əvvəlcə Bakı şəhərində, sonra isə Moskva şəhərində SSRİ Dövlət Plan Komitəsi yanında İqtisadiyyat Elmi-Tədqiqat İnstitutunda əyani aspiranturada oxumuş, "Azərbaycan SSR əhalinin sosial qruplarının həyat səviyyəsinin yaxşılaşdırılması problemləri (iqtisadi təhlil və planlaşdırma məsələləri)" mövzusunda namizədlik dissertasiyasını müdafiə etmiş, iqtisad elmləri namizədi elmi dərəcəsi almışdır.
1975-ci ilin noyabrından 1994-cü ilin may ayına kimi Azərbaycan Respublikası İqtisadiyyat Nazirliyinin ETİİ-də kiçik elmi işçi vəzifəsindən şö’bə müdiri vəzifəsinədək yüksəlmiş, 1994-cü ilin may ayından Azərbaycan Respublikası Milli Məclisinin İqtisadi qanunvericilik şö’bəsində baş məsləhətçi vəzifəsində çalışır. Bazar iqtisadiyyatının tələblərinə uyğun iqtisadi qanunvericilik bazasının yaradılmasında fəal iştirak edir.
Əmirxan Babaşov "1976-1990-cı illərdə Azərbaycan SSR-də məhsuldar qüvvələrin inkişafı və yerləşdirilməsinin əsas istiqamətləri" (Bakı, 1978), "2000-ci ilə qədər Azərbaycan SSR-nin məhsuldar qüvvələrinin inkişafı və yerləşdirilməsi sxemi" (Bakı, 1982), "1985-2005-ci illərdə Azərbaycan SSR-də elmi-texniki tərəqqinin Kompleks Proqramı" (Moskva, 1983), "1991-2010-cu illərdə SSRİ-də elmi-texniki tərəqqinin Kompleks Proqramı (Regional bölmə)" (Moskva, 1989) fundamental sənədlərin müəlliflərindən biri olmuşdur.
Ə. Babaşov Bakı, Moskva, Kiyev, Minsk, Tbilisi və digər şəhərlərdə keçirilən simpozium və konfranslarda elmi məruzələrlə çıxış etmiş və həmin şəhərlərdə 50-dən çox elmi əsəri çap olunmuşdur. O, 3 kitabçanın və 20-yə qədər elmi məqalənin müəllifidir. O, "İqtisadiyyat və həyat" jurnalında və bir çox kitabların nəşrində elmi redaktor olmuşdur.
Ə. Babaşov elmi və qanunvericilik bazasının yaradılması ilə yanaşı Neft Akademiyasında, İnşaat Mühəndisləri Universitetində, Əmtəəşünaslıq-Kommersiya İnstitutunda, Təfəkkür Universitetində iqtisadçı bakalavr və magistrantlara iqtisad elminin aktual problemlərindən mühazirə oxuyur, elmi işçi, aspirant və magistrantlara elmi rəhbərlik edir.

ADİL HÜSEYNOV

Adil İsa oğlu Hüseynov 1942-ci il oktyabr ayının 16-da Bolnisi rayonunun Faxralı kəndində anadan olmuşdur. 1949-cu ilin sentyabrında Faxralı kənd orta məktəbinin 1-ci sinfinə getmiş və 1959-cu ildə həmin orta məktəbi müvəffəqiyyətlə bitirmişdir.
1959-cu ildə Azərbaycan Dövlət Universitetinin mexanika-riyaziyyat fakültəsinə daxil olmuşdur. Universiteti 1965-ci ildə bitirmiş və işləmək üçün Ali Təhsil Nazirliyinin tə’yinatı ilə indiki Azərbaycan Elmi-Tədqiqat Neft Layihə institutunun yeraltı hidrodinamika laboratoriyasına göndərilmişdir. Bu laboratoriyada 1971-ci ilədək mühəndis vəzifəsində işləməklə bərabər, Universitetin rə'yi əsasında 1965-ci ildə Azərbaycan SSR Elmlər Akademiyasının Mexanika və Riyaziyyat İnstitutunda hidroaerodinamika və qazodinamika ixtisası üzrə aspiranturaya qəbul olunmuş və oranı 1969-cu ildə müvəffəqiyyətlə bitirmişdir. 1971-ci ilin mart ayında fizika-riyaziyyat elmləri namizədi elmi dərəcəsi almaq üçün indiki BDU-nun mexanika-riyaziyyat fakültəsinin elmi şurasında "Hissə-hissə bircins məsaməli mühitdə süzülmənin fəza məsələlərinin hidrodinamika tədqiqi" mövzusunda dissertasiya müdafiə etmişdir. Adil Hüseynov 1971-1973-cü illərdə Azərbaycan Elmi-Tədqiqat Neft Layihə institutunda kiçik elmi işçi, 1973-1980-ci illərdə isə baş elmi işçi vəzifəsində işləmişdir. 1980-ci ildən indiyədək Azərbaycan Texniki Universitetinin riyaziyyat-2 kafedrasında dosent vəzifəsində işləyir. 25-dək elmi məqalənin və 2 metodik vəsaitin müəllifidir.

ARİF BƏDƏLOV

Arif Bayraməli oğlu Bədəlov 1959-cu ildə Bolnisi rayonunun Faxralı kəndində anadan olmuşdur. 1976-cı ildə Faxralı kənd orta məktəbini bitirmiş və həmin ildə Azərbaycan Dövlət Universitetinin kimya fakültəsinə qəbul olmuşdur. 1981-ci ildə Universiteti bitirdikdən sonra Azərbaycan Elmlər Akademiyasının "Bioloji Tədqiqatlar Mərkəzində" əmək fəaliyyətinə başlamışdır. 1983-1985-ci illərdə SSRİ Elmlər Akademiyasının Biokimya İnstitutunda (Moskva şəhər) tədqiqat işi aparmış, 1985-ci ildə həmin İnstitutun biokimya ixtisası üzrə məqsədli aspiranturasına qəbul olmuşdur. 1989-cu ildə namizədlik dissertasiyasını müdafiə edib kimya elmləri namizədi elmi dərəcəsi almışdır.
Arif Bədəlov müdafiədən sonra bir müddət Azərbaycan Elmlər Akademiyasında elmi fəaliyyətini davam etdirmiş, sonra isə orta məktəblərdə kimyadan dərs demişdir. Hal-hazırda orta məktəbdə, "Zəngi" litseyində kimya müəllimi kimi fəaliyyət göstərir.
Arif Bədəlovun elmi və pedaqoji fəaliyyəti 12 elmi məqalədə öz əksini tapmışdır.

ASLAN POLADOV

Aslan Nəbi oğlu Poladov 1939-cu il yanvarın 2-də Borçalı mahalının Bolnisi rayonunun Faxralı kəndində, kolxozçu ailəsində anadan olmuşdur. Orta məktəbi bitirdikdən sonra 11959-1961-ci illərdə Sovet Ordusunda xidmət etmişdir. Ordudan təxris olunduqdan sonra, yə’ni 1961-ci ildə indiki BDU-nun əmtəəşünaslıq fakültəsinə qəbul olunmuş və 1966-cı ildə Azərbaycan Dövlət Universitetini fərqlənmə diplomu ilə bitirmişdir.
A.Poladov universiteti bitirdikdən sonra əmtəəşünas kimi Azərbaycan Dəmir Yolu İdarəsində əmək fəaliyyətinə başlamışdır. Lakin elmə olan həvəsi onu 1967-ci ildə Azərbaycan SSR Dövlət Plan Komitəsi nəzdində ETİİ-nin aspirantı olmuşdur. Aspiranturanı bitirdikdən sonra Azərbaycan Elmlər Akademiyasının İqtisadiyyat İnstitutuna kiçtk elmi işçi vəzifəsinə dəvət olunmuşdur.
A. Poladolv 1972-ci ildə "Azərbaycan SSR-də şəxsi yardımçı və ev təsərrüfatında məşğul olan əmək ehtiyatlarından istifadənin ictimai-iqtisadi məsələləri" mövzusunda iqtisad elmləri namizədi alimlik dərəcəsi almaq üçün dissertasiya işini müvəffəqiyyətlə müdafiə etmiş və 1977-ci ildə həmin institutda baş elmi işçi vəzifəsinə irəli çəkilmişdir.
Aslan Poladov 1983-cü ildən ömrünün sonuna kimi Azərbaycan Dövlət Bədən Tərbiysi İnstitutunda dosent vəzifəsində işləmişdir.
Aslan Poladovun elmi və pedaqoji fəalliyyəti bir monoqrafiyada, 50-dən çox elmi məqalələrdə öz əksini tapmışdır.
O, 2001-ci ilin baharında vəfat etmişdir.

DÜNYAMALI ŞƏRİFOV

Dünyamalı İsa oğlu Şərifov 1957-ci il dekabr ayının 1-də Bolnisi rayonunun Faxralı kəndində anadan olmuşdur. 1995-ci ildə Faxralı səkkizillik məktəbinin birinci sinfinə daxil olmuş, 1975-ci ildə Faxralı orta məktəbini ə’la qiymətlərlə bitirmişdir. 1976-cı ildə Azərbaycan Dövlət Kənd Təsərrüfatı İnstitutunun meyvə-tərəvəzçilik və üzümçülük fakültəsinə daxil olmuş, 1981-ci ildə həmin fakültədə təhsilini fərqlənmə diplomu ilə başa vurmuşdur . İnstitutun göndərişi ilə 1982-1985-ci illərdə Moskvada əyani aspiranturaya qəbul olmuş və 1985-ci ildə Ümumittifaq Tərəvəz Təsərrüfatı İnstitutunda "Tərəvəz bitkilərinin sənaye texnologiyası ilə becərilməsinin əsasları" mövzusunda dissertasiya müdafiə etmişdir. 1985-1990-cı illərdə Respublika Aqrar Sənaye Komitəsinin ET Tərəvəzçilik İnstitutunda elmi işçi, aparıcı elmi işçi və şö'bə müdiri işləmişdir. 1991-1993-cü illərdə Səhiyyə Nazirliyinin "Farmakologiya və Xalq Təbabəti" EİB-də şö'bə rəisi vəzifəsində, 1993-1996-cı illərdə "Azəriqaz" Dövlət Şirkətində baş mütəxəssis kimi işləmişdir. 1997-ci ildən indiyə qədər Dövlət Neft Şirkətinin Quruda Neft və Qazçıxarma İstehsalat Birliyinin tabeliyində olan yardımçı təsərrüfat idarəsinin rəisi vəzifəsində işləyir.

Dünyamalı Şərifovun elmi fəaliyyəti 18 elmi əsərdə öz əksini tapmışdır. O, bir neçə beynəlxalq və respublika səviyyəli konfransların iştirakçısı olmuş, elmi məqalələr çap etdirmişdir.

ELDAR MƏMMƏDOV

Eldar Hüseynqulu oğlu Məmmədov 1949-cu il may ayının 5-də Bolnisi rayonunun Faxralı kəndində anadan olmuşdur. 1955-ci ildə Faxralı orta məktəbinin 1-ci sinfinə getmiş, 1965-ci ildə ekstern yolu ilə Bakı şəhərinin 190 saylı məktəbini bitirmişdir. 1965-ci ildə Azərbaycan Neft və Kimya İnstitutuna (indiki ADNA) qəbul olmuş, 1969-cu ildə Azərbaycan Xalq Təsərrüfatı İnstitutunu bitirmişdir. 1969-1991-ci illərdə Azərbaycan Dövlət Plan Komitəsi nəzdində Elmi-Tədqiqat İqtisadiyyat İnstitutunda kiçik elmi işçi, baş elmi işçi, qrup rəhbəri, bölmə və şö'bə müdiri vəzifəsində işləmişdir. 1987-ci ildə iqtisad elmləri namizədi elmi dərəcəsi almaq üçün "Pedaqoji kadrların hazırlanmasının, planlaşdırılmasının və istifadəsinin təkmilləşdirilməsi məsələləri" mövzusunda dissertasiya müdafiə etmişdir.

Eldar Məmmədov "2000-ci ilə qədər Azərbaycan SSR-nin məhsuldar qüvvələrinin inkişafı və yerləşdirilməsi sxemi" iki cildliyinin (Bakı 1982), "1985-2005-ci illərdə Azərbaycan SSR-də elmi-texniki tərəqqinin Kompleks Proqramı (regional bölmə)" (Moskva 1989) və s. Dövlət əhəmiyyətli fundamental elmi-tədqiqatların müəlliflərindən biri olmuşdur.

Eldar Məmmədov Bakı, Moskva, Kiyev, Minsk, Alma-Ata, Tbilisi, Yerevan, Riqa şəhərlərində keçirilən simpozium və konfranslarda elmi mə’ruzələrlə çıxış etmişdir. Azərbaycan, rus, ingilis və erməni dillərində 80 elmi əsərin (o cümlədən bir kitab) müəllifidir.

Hal-hazırda Azərbaycan Respublikası Əmək və Əhalinin Sosial Müdafiəsi Nazirliyində idarə rəisinin müavini vəzifəsində işləyir.

ELXAN MƏMMƏDLİ

Elxan Hüseynqulu oğlu Məmmədli 1946-cı il yanvar ayının 1-də Borçalının Bolnisi rayonunun Faxralı kəndində müəllim ailəsində anadan olmuşdur. 1962-ci ildə Faxralı kənd orta məktəbinin 9-cu sinfini bitirdikdən sonra ailəliklə Bakı şəhərinə köçmüşlər. 1962-1963-cü dərs ilində Bakıdakı 23 saylı orta məktəbi bitirmişdir. Həmin illərdə Bakıda bir sıra zavod və fabriklərdə çalışmışdır. 1965-ci ildə ADU-nun (indiki BDU-nun) filologiya fakültəsinə daxil olmuş, 1971-ci ildə ali təhsilini uğurla başa vurmuşdur . Elmi fəaliyyətə "Şair Nəbinin həyat və yaradıcılığı"na həsr etdiyi diplom işi ilə başlamışdır. 1969-cu ildən folklorumuzun toplanması və təbliği ilə bağlı geniş fəaliyyət göstərir. Həmin ildən e’tibarən Azərbaycan radiosunda fəaliyyət göstərən "Bulaq" verlişinin aparıcı müəlliflərindən biri kimi tanınmışdır. Yaradıcı ömrünün on ildən çoxunu "Bulağ"a həsr edən Elxan Məmmədli 80-ci illərin əvvəlindən başlayaraq Azərbaycan televiziyasında saz-söz sənətkarlarına həsr etdiyi bir sıra verilişləri ilə də yadda qalmışdır.

1979-cu ildən öz taleyini Nizami adına Ədəbiyyat İnstitutunun folklor şö'bəsi ilə bağlayan tədqiqatçı-alim bu illər ərzində bir sıra folklor kitablarının işıq üzü görməsində əlindən gələni əsirgəməmişdir. Belə ki, iki cilddən ibarət "Azərbaycan aşıqları və el şairləri" (1984-cü il), "Azərbaycan bayatıları" (1984-cü il), "Cinaslar" (1985-ci il), "Bayatı, qoşma, təcnis" (1988-ci il), "Borçalı şair Nəbi" (1991-ci il) kimi kitabların tərtib və toplanması məhz Elxan Məmmədlinin yorulmaz əməyinin məhsuludur.

Filologiya elmləri namizədi elmi dərəcəsi almaq üçün yazdığı "Təcnis sənətkarlığı" dissertasiyası nəzəri baxımdan kamil poetika əsəri kimi mütəxəssislər tərəfindən yüksək qiymətləndirilmişdir. 50-dən çox elmi məqalənin və bir sıra monoqrafiyanın müəllifidir. 1992-ci ildən bu günə kimi Azərbaycan radiosunda "Sarıtel" və "Gözəlləmə" həftəlik musiqili verilişlərin aparıcısı kimi sazın-sözün təbliği işində əvəzsiz xidmət göstərir.

Elxan Məmmədov hazırda üç cildlik "Borçalı folkloru" kitabları üzərində işləyir.

Filologiya elmləri namizədi Elxan Məmmədli doktorluq işini başa vurmaq üzrədir.

E’TİMAD AYVAZOV

Etimad Bayram oğlu Ayvazov 1951-ci il martın 14-də Borçalının Faxralı kəndində qulluqçu ailəsində anadan olmuşdur. 1958-ci ildə Faxralı orta məktəbinə daxil olmuş və 1968-ci ildə həmin məktəbi ə’la qiymətlərlə bitirmişdir. 1968-ci ildə Azərbaycan Politexnik İnstitutunun (indiki ATU-nun) mexanika fakültəsinə daxil olmuş və oranı bitirdikdən sonra Bakı Məişət Kondisionerləri Zavodunun Xüsusi Layihə Konstruktor Texnoloji bürosunda müxtəlif vəzifələrdə çalışmışdır. 1974-cü ildən həyatını ali məktəblə bağlayıb, yə’ni 4 ilə yaxın Politexnik İnstitutunda tələbələrin diplom işlərinə rəhbərlik etmişdir.

1978-ci ildən isə Azərbaycan İnşaat Mühəndisləri İnstitutunda materiallar müqaviməti fənnindən dərs deməklə yanaşı həm də həmin institutda əyani aspiranturaya daxil olmuşdur. 1983-cü ildə isə aspiranturanı bitirərək müdafiə etmiş, fizika-riyaziyyat elmləri namizədi elmi dərəcəsi almışdır. 1983-cü ildən Azərbaycan Təhsil Nazirliyinin göndərişi ilə yenə həmin Universitetin nəzəri mexanika kafedrasına tə’yinatla göndərilərək müəllim kimi fəaliyyət göstərmişdir.

İlk dəfə olaraq Etimad Ayvazov tərəfindən latın qrafikalı şriftlə ali məktəblər üçün "Nəzəri mexanika" fənni üzrə yüksək tirajlı dərslik yazılmışdır. Etimad Ayvazov 100-ə qədər elmi məqalənin, o cümlədən ali məktəb tələbələri və aspirantlar üçün 6 elmi metodik əsərin müəllifidir. Hazırda Etimad Ayvazov İnşaat Mühəndisləri Universitetinin nəzəri mexanika kafedrasında dosent vəzifəsində çalışmaqla yanaşı, həm də Azərbaycan Respublikası Dövlət Əmlak Nazirliyində şö'bə rəisi vəzifəsində işləyir.

BAHƏDDİN NƏBİYEV

Bahəddin Alı oğlu Nəbiyev 1948-ci ildə Bolnisi rayonunun Faxralı kəndində anadan olmuşdur. O, 1955-ci ildə Faxralı orta məktəbinin birinci sinfinə getmiş və 1966-cı ildə həmin məktəbi bitirmişdir. Bahəddin Nəbiyev 1966-cı ildə Azərbaycan Dövlət Universitetinin (indiki BDU-nun) Kimya fakültəsinə daxil olmuş və 1972-ci ildə həmin Universiteti fərqlənmə diplomu ilə bitirmişdir. Bahəddin Nəbiyev bir il Əli Bayramlı şəhərində 5 saylı orta məktəbdə kimya müəllimi işləmişdir. O, 1972-ci ildə Azərbaycan Respublikası EA Qeyri Üzvi və Fiziki Kimya İnstitutunda aspiranturaya daxil olmuş və keçmiş SSRİ-nin N.D.Zelinski adına Üzvi Kimya İnstitutuna (Moskva şəhəri) elmi e’zamiyyətə göndərilmişdir. Bahəddin Nəbiyev 1976-cı ildə həmin İnstitutda namizədlik dissertasiyası müdafiə etmiş və kimya elmləri namizədi elmi dərəcəsi almışdır. Bahəddin Nəbiyev 1976-1978-ci illərdə Azərbaycan Respublikası EA Qeyri-Üzvi və Fiziki Kimya İnstitutunda mühəndis və kiçik elmi işçi vəzifəsində işləmişdir. O, 1978-ci ildən indiki Azərbaycan Dövlət Kənd Təsərrüfatı Akademiyasının kimya kafedrasında dosent vəzifəsində işləyir. Bahəddin Nəbiyev 50-dən çox elmi və elmi metodik məqalələrin və dərs vəsaitinin müəllifidir. Ali məktəblərə daxil olanlar üçün çox faydalı olan "Kimya" dərsliyini nəşr etdirmişdir.

Bahədddin Nəbiyev 10-dan çox ittifaq və respublika səviyyəli konfranslarda çıxış edib materiallar çap etdirmişdir.

HƏSƏNƏLİ ƏLİZADƏ

Həsənəli Əli oğlu Əlizadə 1922-ci ildə Borçalı mahalının Bolus nümayəndəliyinin Faxralı kəndində anadan olmuşdur. 1931-ci ildə Faxralı orta məktəbinin 1 sinfinə getmiş, 1941-ci ildə həmin məktəbi bitirmişdir. 1941-ci ildə hərbi xidmətə çağırılmış, 1942-ci ildə cəbhədə yaralanıb və həmin ilin sonunda ordudan tərxis olunmuşdur. 1943-1945-ci illərdə kolxozda mühasib işləmişdir. 1945-ci ildə Azərbaycan Xalq Təsərrüfatı İnstitutuna daxil olmuş, 1949-cu ildə həmin institutu bitirmişdir. 1949-1950-ci illərdə Mərkəzi Statistika İdarəsinin Tovuz rayon şö’bəsində müfəttiş, 1950-1952-ci illərdə mühasib, 1952-1955-ci illərdə Gəncə vilayət maliyyə şö’bəsində vergi üzrə baş müfəttiş vəzifələrində çalışmışdır. 1955-ci ildən ömrünün sonunadək Azərbaycan kənd təsərrüfatı Akademiyasının mühasibat uçotu və statistika kafedrasında dosent vəzifəsində çalışmışdır. 1971-ci ildə namizədlik dissertasiyasını müdafiə etmiş və iqtisad elmləri namizədi elmi dərəcəsi almışdır. 40-dan çox elmi, elmi-metodik göstərişin müəllifidir. Bir neçə dəfə keçmiş ittifaq və respublika konfranslarının iştirakçısı olmuş, məqalələr çap etdirmişdir.

XƏLƏDDİN ƏHMƏDOV

Xələddin Əmir oğlu Əhmədov 1941-ci il fevralın 1-də Bolnisi rayonunun Faxralı kəndində anadan olmuşdur. Xələddin Əhmədov 1947-ci ildə Cəfərli ibtidai məktəbinin 1-ci sinfinə daxil olmuş, 1951-ci ildə həmin məktəbin 4-cü sinfini ə’la qiymətlərlə başa vurmuş, Qoçulu kənd 8 illik məktəbinin 5-ci sinfinə daxil olmuşdur. Həmin məktəbi də ə’la qiymətlərlə bitirdikdən sonra 1955-ci ildə Bolnisi rayonunun Arıxlı orta məktəbinin 9-cu sinfinə daxil olmuşdur. Orta məktəbi 1958-ci ildə qızıl medalla bitirmiş, Azərbaycan Politexnik İnstitutunun mexanika fakültəsinə daxil olmuşdur. 1963-cü ildə institutu müvəffəqiyyətlə bitirmişdir. Həmin il göndərişlə Bakının leytenant Şmidt adına (indiki Səttarxan adına) neft maşınqayırma zavodunda mühəndis-konstruktor vəzifəsində əmək fəaliyyətinə başlamışdır. 1963-1965-ci illərdə hərbi xidmətdə olmuşdur. Ordudan tərxis olunduqdan sonra (1965-1966-cı illərdə) öz əvvəlki iş yerinə qayıtmışdır.

Elmə və texnikaya olan həvəsi 1966-cı ildə onu vaxtilə təhsil aldığı Azərbaycan Politexnik İnstitutunun maşınqayırma texnologiyası kafedrasına gətirmişdir. Burada o, pedaqoji fəaliyyətlə yanaşı elmi işlə də məşğul olmuşdur. 1971-ci ildə keçmiş SSRİ-nin ən qabaqcıl texniki ali təhsil ocağı olan N.E. Bauman adına Moskva Ali Texniki məktəbində əyani aspiranturanı bitirmiş, namizədlik dissertasiyası müdafiə edərək texnika elmləri namizədi elmi dərəcəsinə layiq görülmüşdür.

Ələddin Əhmədov Azərbaycanda maşın detallarının e’malı zamanı yaranan daxili gərginlikləri ətraflı tədqiqat edən ilk mütəxəssisdir. Elmi-texniki jurnallarda çap olunmuş 10-dan çox elmi məqalənin və tədris metodik vəsaitinin müəllifidir. Xələddin Əhmədov 1988-ci ildə T.Q. Şevçenko adına Kiyev Dövlət Universitetin nəzdində 10 aylıq xüsusi xarici dillər kurslarının fransız dili şö’bəsini müvəffəqiyyətlə bitirmiş, 1989-1992-ci illərdə Əcəzair Xalq Demokratik Respublikasının Beşar Texniki Universitetində müəllim işləmişdir. Hazırda o, Azərbaycan Texniki Universitetinin maşınqayırma fakültəsinin metalkəsən dəzgahlar və alətlər kafedrasının dosentidir.

İBRAHİM ƏLİZADƏ

İbrahim İlyas oğlu Əlizadə 1956-cı ildə Bolnisi rayonunun Faxralı kəndində anadan olmuş, 1973-cü ildə Faxralı kənd orta məktəbini bitirmişdir. Orta məktəbdə oxuduğu zaman fizikaya olan həvəsi onu Azərbaycan Dövlət Universitetinin fizika fakültəsinə gətirmiş və 1978-ci ildə həmin fakültəni müvəffəqiyyətlə bitirmişdir. Ağsu rayonunun İlxıçı kənd orta məktəbində bir il müəllim işlədikdən sonra, 1980-cı ildə "Azon" zavodunun xüsusi konstruktor bürosuna mühəndis-konstruktor vəzifəsinə işə düzəlmişdir. 1982-ci ildən Azərbaycan İnşaat Mühəndisləri İnstitutunun fizika kafedrasında baş laborant vəzifəsində işə başlamış və 1983-cü ildə "Bərk cisimlər fizikası" ixtisası üzrə əyani aspiranturaya daxil olmuşdur. 1984-cü ildən aspiranturadakı təhsilini Moskva Fizika Mühəndisləri İnstitutunda (MFMİ) məqsədli aspirant kimi davam etdirmişdir. 1986-cı ildə MFMİ-də fəaliyyət göstərən ixtisaslaşdırılmış elmi şurada vaxtından əvvəl namizədlik dissertasiyası müdafiə etmiş, fizika-riyaziyyat elmləri namizədi elmi dərəcəsi almışdır.

1991-ci ildən AzİMU-nun fizika kafedrasında baş elmi işçi vəzifəsində işləmişdir. İbrahim Əlizadənin aldığı elmi nəticələr respublikamızın və ABŞ, İtaliya, Türkiyə kimi ölkələrin elmi jurnal və toplularında çap olunmuşdur. İbrahim Əlizadə 1987-ci ildən AzİMU-nun "Fizika" kafedrasında əvvəlcə baş laborant, sonradan isə assistent işləmişdir. O, "Fizika" fənnindən laboratoriya dərslərində tədris-metodiki vəsaitinin müəlliflərindən biridir. 1991-ci ildə "Fizika", "Abituriyentlər üçün vəsait" kitabını çap etdirmişdir. 1996-cı ildə "Fizika, Ali məktəblərə daxil olmaq istəyənlər üçün testlər" kitabçasını çap etdirmişdir. Azərbaycan Respublikası Təhsil Nazirliyinin qrifi ilə Əcnəbi vətəndaşların hazırlıq fakültələri üçün "Fizika" fənni proqramının müəllifidir. 1993-1997-ci illərdə AzİMU-nun "Ümumi texniki fənlər" (sonralar "Ümumi hazırlıq fənləri") kafedrasının müdiri vəzifəsində işləmiş, 1995-ci ildən dosentdir. 1996-1999-cu illərdə eyni zamanda AzİMU-nun nəzdində fəaliyyət göstərən fizika-riyaziyyat təmayüllü litseyin direktor müavini vəzifəsində çalışmışdır. 1997-ci ildən indiyə qədər fizika kafedrasında dosent, kafedra müdirinin müavini vəzifəsində işləyir. O, 50-yə qədər elmi məqalənin, dərs vəsaitinin və metodik göstərişin müəllifidir.

İSA BABAŞOV

İsa Səməd oğlu Babaşov 1939-cu il avqust ayının 1-də Bolnisi rayonunun Faxralı kəndində anadan olmuşdur. O, 1958-ci ildə Faxralı orta məktəbini bitirdikdən sonra AzPİ-nin mexanika fakültəsinə daxil olmuşdur. 1963-cü ildə həmin institutu fərqlənmə diplomu ilə bitirmişdir. 1964-1965-ci illərdə orduda xidmət etmiş, tərxis olunduqdan sonra Azərbaycan Politexnik İnstitutunun metallurgiya kafedrasında müəllim işləmişdir. 1968-1971-ci illərdə Moskva Polad və Ərintilər İnstitutunda aspiranturada oxumuş və "Dəmir-kükürd sisteminin təzyiq-temperatur-tərkib

koordinatlarındakı diaqramının tədqiqi" mövzusunda namizədlik dissertasiyasını müdafiə etmişdir. Sonra Azərbaycan Politexnik İnstitutunda müəllimlik fəaliyyətini davam etdirmişdir.

1973-cü ildə İsa Babaşov Moskva şəhərində yerləşən "Vsesoyuznıy Nauçno-İssledovatelskiy İnstitut Neorqoaniçeskix Materialov (VNİİNM)" institutuna işə də’vət olunmuş və həmin institutda 1985-ci ilin sentyabr ayına qədər baş elmi işçi və elmi qrupun rəhbəri vəzifəsində çalışmışdır. Sonrakı illərdə pedaqoji və elmi fəaliyyətini Azərbaycan Politexnik İnstitutunda və "Azərelektromaş" Elmi-İstehsalat Birliyinin Azərbaycan Elmi-Tədqiqat Elektrotexnika İnstitutunda davam etdirmişdir. İsa Babaşov 40 elmi əsərin müəllifidir. Elmi-tədqiqat işlərinin nəticələri haqqında Moskva, Leninqrad, Sverdlovsk və Bakı şəhərində keçirilən elmi konfranslarda çıxış etmişdir. Onun məqalələri Moskvada Bakıda çıxan jurnal və məcmuələrdə nəşr olunmuşdur. İsa Babaşov öz tədqiqatlarında metallurji proseslərin nəzəri və praktiki məsələlərin həllinə, riyazi üsulların elmi-tədqiqat işlərində tətbiq olunmasına geniş yer vermişdir. O, "Riyazi üsulların elmi-tədqiqat işlərinə tətbiqi" adlı kitabın müəlliflərindən biridir.

İSA XƏLİLOV

İsa Əli oğlu Xəlilov 1961-ci il may ayının 2-də Bolnisi rayonunun Faxralı kəndində ziyalı ailəsində anadan olmuşdur.

1968-1978-ci illərdə Faxralı kəndində orta təhsil almışdır. 1978-ci ildə məktəbi ə’la qiymətlərlə başa vurub elə həmin ildə də Azərbaycan Politexnik İnstitutunun (indiki Azərbaycan Texniki Universitetinin) maşınqayırma fakültəsinə daxil olmuşdur.

1983-cü ildə Azərbaycan Respublikası Təhsil Nazirliyi onun qaydadankənar (iki il tə’yinat üzrə işləmədən) aspiranturaya sənəd verməsi haqqında sərəncam vermişdir. 1984-cü ildə İsa Xəlilov aspiranturaya daxil olmuş, 1990-cı ildə "Dişli muftaların sistemli ehtimal hesabı alqoritminin yaradılması" mövzusunda namizədlik dissertasiyası müdafiə etmiş, texnika elmləri namizədi elmi dərəcəsi almışdır. 30-dan çox elmi əsərin müəllifidir. Əsərləri Azərbaycanda, Rusiyada, Türkiyədə, Almaniya Federativ Respublikasında nəşr edilmişdir. 4 elmi-metodik məcmuənin, 1 dərsliyin və 2 texniki lüğət kitabının müəllifidir. "Makine elemanları sözlüyü" adlı rusca-azərbaycanca-türkcə-ingiliscə texniki lüğət kitabı Türkiyədə nəşr edilmişdir. "Elevatorların layihələndirilməsi" adlı dərs vəsaiti bu sahədə azərbaycanca yazılmış ilk kitabdır. Azərbaycanda ilk dəfə olaraq "Maşınların yaradılmasının texniki əsasları" fənni üzrə mühazirələrin müəllifidir.

1987-1991-ci illərdə Azərbaycan Texniki Universitetinin "Maşın detalları və YQNM" kafedrasında assistent, 1991-ci ildən bu günə kimi isə dosent vəzifəsində çalışır. Bununla yanaşı 1990-1992-ci illərdə həmin universitetin "Robot texnikası" fakültəsində tədris işləri üzrə, 1993-1998-ci illərdə isə elmi işlər üzrə dekan müavini vəzifəsində çalışmışdır.

O, 1988-ci ildə Moskvada Bauman adına Ali Texnika Məktəbdə ixtisasartırma kursu keçmişdir. 1992-ci ildə Almaniya Federativ Respublikasının Akademik Mübadilələr İdarəsi İsa Xəlilovun elmi fəaliyyətini nəzərə alıb onu bir illik Boxum şəhərinin Ruhr Universitetinə elmi işə dəvət etmişdir. O, burada tamamilə yeni bir prinsiplə işləyən yumruqlu mexaniki ötürmənin kinematik hesabı alqoritmini tərtib etmişdir. 1998-ci ildə AFR Akademik Mübadilələr İdarəsi yenidən İsa Xəlilovu Almaniyanın Karlsrue Universitetinə elmi işə dəvət etmişdir.

İsa Xəlilov 1996-1997-ci illərdə AFR-nın 80 illik tarixi olan, bütün dünyada texniki-iqtisadi kadr mübadilələri aparan məşhur Karl Düysberq cəmiyyətinin dəvəti ilə yenidən Almaniyada olmuşdur.

İsa Xəlilov hal-hazırda Daymler Kraysler AC-nin Azərbaycan təmsilçiliyində satış şö’bəsinin müdiri vəzifəsində çalışır.

KƏRİM KƏRİMOV

Kərim Məmmədəli oğlu Kərimov 1929-cu ildə Borçalı mahalının Çürük Qəmərli nümayəndəliyinin (Bolnisi rayonu) Faxralı kəndində anadan olmuşdur. 1937-ci ildə Faxralı kənd orta məktəbinin birinci sinfinə getmiş və 1948-ci ildə həmin məktəbi bitirmişdir.

1949-cu ildə Gəncə şəhərində Azərbaycan Kənd Təsərrüfatı İnstitutunun zootexnik fakültəsinə daxil olmuş, 1954-cü ildə həmin fakültəni bitirib zootexnik ixtisasına yiyələnmişdir.

1955-ci ildə Faxralı kəndinə qayıtmış və "Qələbə" kolxozunun baş zootexniki vəzifəsini icra etmişdir.

1967-ci ildə Kərim Kərimov həmin kolxozun partiya təşkilatının katibi işləmişdir. 1968-ci ildən 1973-cü ilədək həmin kolxozun sədri olmuşdur.

Kərim Kərimov əmək fəaliyyəti ilə yanaşı, eyni zamanda elmi işlə də məşğul olmuşdur. 1968-1973-cü illərdə Azərbaycan Elmi-Tədqiqat Heyvandarlıq İnstitutunda qiyabi aspiranturada oxumuşdur. 1974-cü ildə namizədlik dissertasiyası müdafiə edib kənd təsərrüfatı elmləri namizədi elmi dərəcəsi almışdır.

Kərim Kərimovun elmi və əmək fəaliyyəti 5 elmi əsərdə və 10-a yaxın elmi-praktiki məqalədə öz əksini tapmışdır. O, əməkdə qazandığı nailiyyətə görə "Qırmızı Əmək Bayrağı" ordeni və bir neçə əmək rəşadəti medalları ilə təltif olunmuşdur.

Kərim Kərimov öz doğma elində səxavətli və xeyirxah eloğlu kimi də ad-san qazanmışdır. 1970-ci illərin əvvələrində kəndə ətraf bölgədən içməli su çəkdirmişdir.

O, indi təqaüddədir.

QULU BƏDƏLOV

Qulu Əhməd oğlu Bədəlov 1939-cu il avqust ayının 15-də Bolnisi rayonunun Faxralı kəndində anadan olmuşdur. 1957-ci ildə Faxralı orta məktəbini medalla, 1962-ci ildə Azərbaycan Dövlət Universitetinin iqtisad fakültəsini ə’la qiymətlərlə bitirmişdir.

1963-1965-ci illərdə Elmi Tədqiqat Kənd Təsərrüfatı İqtisadiyyatı İnstitutunda elmi işçi, 1965-1969-cu illərdə Dövlət Statistika Komitəsində şö'bə rəisi, 1970-1982-ci illərdə Elmlər Akademiyasının İqtisadiyyat İnstitutunda kiçik və baş elmi işçi vəzifələrində işləmişdir.

1973-cü ildə dissertasiya müdafiə edib iqtisad elmləri namizədi elmi dərəcəsi almışdır.

1982-ci ildən Azərbaycan Politexnik İnstitutunun (Texniki Universitet) siyasi iqtisad (iqtisadi nəzəriyyə) kafedrasında dosent vəzifəsində işləmiş, 90-cı illərin əvvəllərindən isə həmin kafedraya rəhbərlik etmişdir.

80-dən çox elmi əsərin, o cümlədən bir çox monoqrafiya və kitabçanın, dərs vəsaitlərinin və tədris metodiki işlərin müəllifidir. Ümumi iqtisadi nəzəriyyə dərsliyinin müəlliflərindən biridir. 10-dan çox namizədlik dissertasiyasının rəsmi opponenti olmuş, çox sayda avtoreferata rə’y vermişdir. Bir çox respublika səviyyəli, eləcə də respublikadan kənar elmi-praktik konfranslarda mə’ruzələrlə çıxış etmişdir. Uzun müddət Respublika Təhsil Nazirliyinin elmi-metodik şurasının "İqtisadiyyat və idarəetmə" bölməsinin üzvü olaraq dərslik və dərs vəsaitlərinə, tədris proqramlarına rə’y verilməsində yaxından iştirak etmişdir.

Qulu Bədəlov hal-hazırda Azərbaycan Texniki Universitetinin iqtisadi nəzəriyyə kafedrasının müdiri vəzifəsində elmi-pedaqoji fəaliyyətini davam etdirir.

QURBAN QASIMOV

Qurban Rəhim oğlu Qasımov 1946-cı il dekabrın 28-də Bolnisi rayonunun Faxralı kəndində anadan olmuşdur. 1962-ci ildə Faxralı orta məktəbini qızıl medalla, 1967-ci ildə Azərbaycan Dövlət Universitetinin mexanika-riyaziyyat fakültəsini fərqlənmə diplomu ilə bitirmiş, aspiranturaya daxil olmuşdur. 1968-1969-cu illərdə orduda xidmət etmişdir. 1970-ci ildən ADU-nun (indiki BDU-nun) fizika fakültəsinin riyaziyyat kafedrasında müəllim, baş müəllim, dosent vəzifəsində çalışmışdır. 1997-1999-cu illərdə Liviya Ərəb Respublikasında Nasır adına Universitetin riyaziyyat bölməsində riyazi-fizika üsullarını, kompleks analiz, diferensial tənliklər nəzəriyyəsinə aid xüsusi kursları ərəb dilində tədris etmişdir.

1973-cü ildə Moskva Dövlət Universitetində namizədlik dissertasiya müdafiə etmiş, elmi dərəcə almışdır. Elmi işləri qeyri-xətti hiperbolik və parabolik tənliklər üçün korrektlik, approksimasiya həyəcanlanma məsələlərinə aid olub, 20-dən çox məqalə çap etdirmişdir. Qurban Qasımovun aspirantura dövründən indiyə qədər elmi nəzəri məqalə və materialları keçmiş Sovetlər birliyinin elmi mərkəzlərində və respublikanın elm ocaqlarında keçirilmiş konfransların bülleten və jurnallarında çap edilmişdir.

MAHAL QURBANOV

Mahal Şaban oğlu Qurbanov 1957-ci il fevralın 16-da Bolnisi rayonunun Faxralı kəndində anadan olmuşdur. 1964-cü ildə Faxralı orta məktəbinin I sinfinə getmiş, 1974-cü ildə həmin məktəbi bitirmişdir. Orta məktəbi bitirən kimi Azərbaycan Dövlət Universitetinin Mexanika-riyaziyyat fakültəsinə daxil olmuş və 1979-cu ildə Universiteti bitirmişdir. Həmin ildən Marneuli şəhər 70 saylı texniki peşə məktəbində müəllimlik fəaliyyətinə başlamış və eyni zamanda Marneuli şəhər orta məktəblərində də dərs demişdir. 1984-cü ildə istehsalatdan ayrılmadan Azərbaycan ETPEİ-nin aspiranturasına daxil olmuş, 1987-ci ildə Tbilisi Dövlət Universitetində namizədlik dissertasiyası müdafiə edib pedaqoji elmlər namizədi elmi dərəcəsi almışdır. Hal-hazırda doktorluq dissertasiyasını yekunlaşdırmaq üzrədir.

1989-cu ildə Gəncə şəhərinə köçmüş, Gəncə şəhər 30 saylı orta məktəbində müəllimlik fəaliyyətini davam etdirmişdir. 1990-cı ildə müsabiqə yolu ilə H. Zərdabi adına Gəncə Dövlət Pedaqoji İnstitutunun Ümumi texniki fənlər kafedrasına müəllim tə’yin olunmuşdur. Sonra dosent vəzifəsinə seçilmişdir. 1998-ci ildən H. Zərdabi adına Gəncə Dövlət Pedaqoji İnstitutunun tərbiyə işləri üzrə prorektoru vəzifəsində çalışır.

Mahal Qurbanovun elmi və pedaqoji fəaliyyəti 15 elmi əsərdə öz əksini tapmışdır. O, bir sıra respublika səviyyəli elmi konfranslarda iştirak etmiş, məqalələr çap etdirmişdir.

MƏMMƏD İBRAHİMOV

Məmməd Məmmədəli oğlu İbrahimov 1948-ci il aprel ayının 15-də Faxralı kəndində fəhlə ailəsində anadan olmuşdur. Orta təhsilini əvvəlcə Faxralı məktəbində, 1959-cu ildən isə Marneuli şəhər interant məktəbində almış və 1966-cı ildə orta məktəbi bitirmişdir.

1967-ci ildən Sumqayıtda Boru yayma zavodunda çilingər işləmiş, 1971-1973-cü illərdə əsgəri xidmətdə olmuşdur. 1975-ci ildən zavodun göndərişi ilə Dnepropetrovsk şəhərində Metallurgiya institutunda oxumuş və 1980-ci ildə fərqlənmə diplomu ilə bitirmişdir.

Həmin il aspiranturaya daxil olmuş və 1986-cı ildə "Metalların təzyiq altında e’malı" ixtisası üzrə namizədlik dissertasiyası müdafiə etmişdir. 1986-cı ilin iyun ayından zavoda qayıtmışdır. Boru yayma zavodunun (indi "Azərboru" SC) texniki şö’bəsinin rəisi - baş mühəndisin müavini vəzifəsində çalışır.

Məmməd İbrahimov 8 ixtira və 30-dan çox elmi məqalənin müəllifidir. Dəfələrlə diplom müdafiəsi komissiyasının sədri olmuşdur. 4 nəfər dissertanta rəhbərlik etmişdir.

Məmməd İbrahimovun elmi və praktiki fəaliyyəti 15 elmi-praktiki əsərdə öz əksini tapmışdır. O, 10 ittifaq və respublika səviyyəli konfranslarda iştirak etmiş, materiallar çap etdirmişdir.

MƏMMƏD MƏMMƏDOV

Məmməd İsrafil oğlu Məmmədov 1930-cu ildə Borçalı mahalının Bolus nümayəndəliyinin Faxralı kəndində anadan olmuşdur. 1947-ci ildə Faxralı orta məktəbini bitirmişdir. 1954-cü ildə ADU-nun (indiki BDU-nun) jurnalistika şö’bəsini fərqlənmə diplomu ilə bitirmiş və tə’yinatla "Sovet kəndi" qəzeti redaksiyasına göndərilmişdir. Uzun müddət həmin qəzetdə rəhbər vəzifədə işləmişdir. Fəal təbliğatçılıq fəaliyyətinə görə Azərbaycan Respublikası Ali Sovetinin fəxri fərmanı ilə təltif edilmiş, Azərbaycan Respublikasının "Əməkdar mədəniyyət işçisi" fəxri adına layiq görülmüşdür. Elmi-tədqiqat işi ilə məşğul olmuş, 1972-ci ildə "Azərbaycan kolxozçusu" qəzeti Azərbaycan kəndinin yenidən qurulması uğrunda mübarizədə" mövzusunda dissertasiya müdafiə edərək tarix elmləri namizədi elmi dərəcəsi almışdır. 1978-ci ildən Texniki Universitetdə tarix kafedrasında müəllim işləmiş, BDU-nun mətbuat tarixi kafedrasında diplom rəhbəri kimi müntəzəm fəaliyyət göstərmişdir. Respublika mətbuatında elmi-publisistik yazılarla çıxış etmişdir. Çoxsaylı elmi-publisistik yazıların müəllifidir. Məmməd Məmmədovun elmi və pedaqoji fəaliyyəti 2 monoqrafiya və 20-ə yaxın elmi məqalədə əks olunmuşdur.   1994-cü ildə Bakıda vəfat etmişdir.

MİNAYƏ NƏBİYEVA

Minayə Yolçu qızı Nəbiyeva 1953-cü ildə Bolnisi rayonunun Faxralı kəndində anadan olmuşdur. 1960-cı ildə birinci sinfə getmiş, 1970-ci ildə isə orta məktəbi bitirmişdir. Həmin ildə Azərbaycan Dövlət Tibb İnstitutunun (indiki ADTU-nun) sanitariya-gigiyena fakültəsinə daxil olmuşdur. 1976-cı ildə ali təhsilini başa vurduqdan sonra 1976-1980-ci illərdə tə’yinatla Xanlar rayon Sanitar Epidemioloji Stansiyasında həkim-epidemioloq kimi fəaliyyət göstərmişdir. 1980-cı ildə o, müsabiqədən keçərək ATİ-nun (indiki ADTU-nun) əmək gigiyenası və peşə xəstəlikləri kafedrasına assistent vəzifəsinə seçilmişdir. 1994-cü ildə "İri sənaye şəhərinin atmosfer çirklənməsinin məktəbəqədər yaşlı uşaqların sağlamlığı vəziyyətinə və immunoloji göstəricilərinə tə’siri" mövzusunda namizədlik dissertasiyası müdafiə etmişdir.

Minayə Nəbiyevanın elmi fəaliyyəti 25 elmi məqalədə və 2 elmi metodik tövsiyədə öz əksini tapmışdır. Hal-hazırda uşaq və yeniyetmələr gigiyenası və əmək gigiyenası kafedrasında baş müəllim vəzifəsində işləyir.

MƏHƏMMƏDƏLİ BABAŞOV

Məhəmmədəli Allahverdi oğlu Babaşov 1959-cu il avqustun 6-da Bolnisi rayonunun Faxralı kəndində anadan olmuşdur. 1966-1976-cı illərdə Faxralı kənd orta məktəbində təhsil almışdır. 1976-cı ildə Azərbaycan Dövlət Universiteti şərqşünaslıq fakültəsinin ərəb filologiyası şö’bəsinə daxil olmuşdur. 1980-ci ildə IV kursdan sonra Yəmən Xalq Demokratik Respublikasına ərəb dili tərcüməçisi kimi e’zam olunmuşdur. 1980-1983-cü illərdə Yəmənin paytaxtı Ədən şəhərində tərcüməçi işləmişdir.

1983-cü ildə Yəməndən geri döndükdən sonra yenidən Universitetin V kursunda təhsilini davam etdirmişdir. 1984-cü ildə Universiteti bitirmiş və keçmiş SSRİ-nin Müdafiə Nazirliyinin xəttilə hərbi xidmət keçmək məqsədilə hərbi tərcüməçi olaraq Əlcəzairə göndərilmişdir. 1984-1986-cı illər ərzində Batna Ali Ümumqoşun hərbi məktəbində tərcüməçi və Biskra hərbi desant qüvvələri məktəbində baş tərcüməçi vəzifəsində xidmət etmişdir. 1987-ci ilin yanvar ayında baş leytenant rütbəsində ordudan tərxis olunmuşdur.

1987-ci ildə Azərbaycana dönərək "Bizim həyat" qəzetində tərcüməçi-müxbir vəzifəsində çalışmışdır. 1989-cu ildə SSRİ Jurnalistlər birliyinin üzvlüyünə qəbul olunmuşdur.

1989-cu ilin noyabr ayından e’tibarən Azərbaycan Respublikası Elmlər Akademiyası Əlyazmalar İnstitutunda baş laborant vəzifəsinə işə qəbul edilmişdir. 1994-cü ilin oktyabr ayına qədər həmin institutun "Ərəbdilli yazılı abidələr" şö’bəsində kiçik elmi işçi vəzifəsində elmi fəaliyyətini davam etdirmişdir. 1992-ci ilin sentyabr ayından 1995-ci ilin mart ayına qədər Türkiyənin xeyriyyəçi-maarifpərvər "Çağ" öyrətim işlətmələri şirkətinin Azərbaycan təmsilçisi olaraq fəaliyyət göstərmişdir. 1994-cü ilin oktyabr ayından "Qafqaz" Universitetinin xarici əlaqələr üzrə prorektoru vəzifəsində işləmişdir. Həmin dövrdən e’tibarən Universitetin dosenti, ilahiyyət fakültəsinin dekanı vəzifəsində çalışmışdır. Hal-hazırda həmin universitetin Dil tədrisi mərkəzinin müdiri və elm, tədris və xarici əlaqələr üzrə rektorun müşaviri vəzifəsində çalışmaqdadır.

1993-cü ildə Azərbaycan Respublikası EA Əlyazmaları İnstitutun dissertantı kimi başladığı "Şafii məzhəbi tərixində Yusif Ərdəbili və onun "əl-Ənvar li-’əməlil-əbrar" əsəri adlı tədqiqat işini tamamlamış və 20 iyun 1997-ci ildə ilahiyyat elmləri namizədi elmi dərəcəsi almaq üçün dissertasiyasını müdafiə etmişdir. İslamşünaslığa dair 2 kitabın tərcüməçisi, 16 elmi əsərin müəllifi və 2 kitabın elmi redaktoru olmuşdur.

MÜRSƏL BUDAQOV

Mürsəl Qərib oğlu Budaqov 1920-ci ildə Bolnisi rayonundakı Faxralı kəndində kəndli ailəsində anadan olmuşdur. Doğma kəndində natamam orta təhsil aldıqdan sonra, Borçalı Türk Pedaqoji məktəbinə daxil olmuş və 1940-cı ildə həmin məktəbi bitirmiş və cəmi bir il Faxralı kəndindəki Şahbuz ibtidai məktəbində müəllim işləmişdir.

1941-ci ildə müharibəyə səfərbər olunmuşdur. 1943-cü ilin aprelində müharibə əlili kimi ordudan tərxis olunmuşdur. M. Budaqov I və II dərəcəli Böyük Vətən Müharibəsi ordenləri və başqa medallarla təltif olunmuşdur.

Ordudan tərxis edildikdən sonra üç ilə yaxın kənd məktəbində müəllim işləmiş və 1946-cı ildə Azərbaycan Dövlət Universitetinə qəbul olunmuşdur. 1951-ci ildə Azərbaycan Dövlət Universitetini müvəffəqiyyətlə bitirib "marksizm-leninizm və marksist-leninçi fəlsəfə" müəllimi ixtisası üzrə diplom almışdır.

M. Budaqov 1951-ci ilin iyulundan 1952-ci ilədək Azərbaycan Elmlər Akademiyası Tarix və Fəlsəfə İnstitutunda kiçik elmi işçi, 1952-ci ildən 1955-ci ilədək "Stalin adına Azərbaycan partiya təşkilatı muzeyində" (sonra V.İ. Lenin adına Mərkəzi Muzeyin Bakı filialı adlandırılmışdır) mühazirəçi işləmişdir. 1963-cü ildən M. Budaqov öz taleyini ali məktəblə - Azərbaycan Pedaqoji Xarici Dillər İnstitutu ilə bağlamışdır. O, ömrünün axırınadək 30 il institutun fəlsəfə kafedrasında baş müəllim, dosent vəzifələrində işləmişdir.

1973-cü ildə dissertasiya müdafiə edərək fəlsəfə elmləri namizədi elmi dərəcəsi almış, 1976-cı ildə isə dosent seçilmişdir.

M. Budaqov tədris işini elmi işlə üzvi surətdə əlaqələndirərək insan şəxsiyyətinin formalaşmasına dair onlarca elmi məqalə dərc etdirmiş, metodiki vəsaitlər yazmışdır.

M. Budaqov 1994-cü ildə vəfat etmişdir.

NADİR QURBANOV

Nadir İsa oğlu Qurbanov 1940-cı ildə Bolnisi rayonunun Faxralı kəndində anadan olmuşdur. 1957-ci ildə orta məktəbi bitirmişdir. 1962-ci ildə hərbi hissədən tərxis olunduqdan sonra 1963-cü ildə Azərbaycan Dövlət Universitetinin biologiya fakültəsinə daxil olmuş və 1968-ci ildə həmin fakültəni bitirmişdir.

1974-cü ildə Azərbaycan Respublikası Elmlər Akademiyasının Zoologiya İnstitutunda aspiranturaya daxil olmuşdur. 1983-cü ildə Moskva şəhərində "Azərbaycanda Qazkimillərin ekologiyası" mövzusunda namizədlik dissertasiyası müdafiə etmişdir. Onun 8 elmi əsəri çap olunmuşdur. 1969-1971-ci illərdə Xaçmaz rayonunun Aşağı-Zeid kəndində müəllim işləmişdir. 1971-ci ildə Qabaqcıl Maarif xadimi adına layiq görülmüşdür.

1971-ci ildə Azərbaycan respublikası müəllimləri təkmilləşdirmə institutunda metodist vəzifəsində işləmişdir. 1995-ci ildən Səbail Rayon Təhsil şö’bəsində metodist vəzifəsində işləyir

 PƏNAH MAHMUDOV

Pənah Hüseyn oğlu Mahmudov 1919-cu ildə Borçalı mahalının Bolus nümayəndəliyinin (Bolnisi) Faxralı kəndində anadan olmuşdur. İlk təhsilini 1927-ci ildə Faxralı yeddiillik məktəbində almışdır. 1934-cü ildə məktəbi bitirib Borçalı Türk Pedaqoji Texnikumuna daxil olmuşdur. Texnikumu 1937-ci ildə bitirib müəllimliyə başlamışdır. Borçalının Baydar, Qasımlı, Aşağı Saral kənd məktəblərində dərs hissə müdiri, məktəb direktoru vəzifələrində çalışmışdır.

1944-cü ildə rayonun partiya komitəsinə işə qəbul olunan gənc Pənah Mahmudov 1947-ci ildə Tiflisdəki ikiillik partiya məktəbinə göndərilmişdir. Partiya məktəbini bitirdikdən sonra o, 1949-cu ildə Marneuli rayonunun maarif şö’bəsinə müdir tə’yin edilmişdir.

1951-ci ildə ali təhsil almaq məqsədilə Bakıya gələn Pənah Mahmudov rayondakı maarif işindən ayrılmış, Azərbaycan Dövlət Universitetinin fəlsəfə bölməsinə daxil olmuşdur. ADU-nu bitirib fəlsəfə kafedrasında saxlanılmış, kafedrada laborant, müəllim işləməklə yanaşı, din sahəsində araşdırmalar aparmışdır. 1964-cü ildə namizədlik dissertasiyası müdafiə etmişdir.

Pənah Mahmudovun "Elm dini mö’cüzələri rədd edir" adlı kitabı nəşr olunmuşdur.

Onun "Marksist Ateizm və humanizm", "Kommunist tərbiyəsində ateizm təbliğatı", "Elmi ateizm üzrə ixtisasa giriş" (metodik göstəriş), "Dini mö’cüzələr varmı?" kitabları da çap olunmuşdur. Bu tədqiqatlarda dinin elmi şərhi sahəsindəki səmərəli ideya xətti əsas olmuşdur.

Bütün bu müddət ərzində Pənah Mahmudov pedaqoji fəaliyyətini də gücləndirib dosent elmi dərəcəsini qazanmışdır.

Pənah Mahmudovun son tədqiqatı fəlsəfə alimləri Mikayıl Məmmədov və Maqsud Cəlilovla birgə yazdıqları "Cəmiyyət, din və ateizm" kitabıdır.

Pedaqoq alimin tədqiqatçılıq fəaliyyətinin bir qismi elmi məqalələr şəklində ifadə edilmiş, yüzdən çox elmi məqalə yazmışdır. Respublikada və keçmiş ittifaq miqyasında elmi konfranslarda, simpoziumlarda mə’ruzələrlə çıxış etmişdir.

Pənah Mahmudov xalqımızın folklor yaradıcılığına xüsusi maraq göstərən ziyalılarımızdan olmuşdur. Xüsusilə Borçalının saz, söz ustadları Aşıq Əmrahın, Aşıq Kamandarın sənəti barədə məqalələr yazaraq onların Azərbaycanda tanınmasına kömək etmişdir.

Pənah Mahmudov 2000-ci ilin oktyab ayında Bakıda vəfat etmişdir.

POLAD POLADOV

Polad Məhəmməd oğlu Poladov 1930-cu ildə Borçalı mahalının Bolus nümayəndəliyinin (indiki Bolnisi rayonu) Faxralı kəndində anadan olmuşdur. 1947-ci ildə Faxralı orta məktəbini bitirmişdir. Həmin il Azərbaycan Pedaqoji İnstitutunun (indiki ADPU) kimya-biologiya fakültəsinə daxil olmuş, 1951-ci ildə institutu bitirdikdən sonra Faxralı orta məktəbində əmək fəaliyyətinə başlamışdır. Elmə olan marağı onu 1962-ci ildə Bakıya qaytarmışdır. Əvvəlcə Azərbaycan Politexnik İnstitutunda (indiki AzTU) kimya kafedrasında baş laborant kimi fəaliyyət göstərən Polad Poladov sonralar assistent, baş müəllim olmuş, 1972-ci ildə kimya elmləri namizədi elmi dərəcəsi almaq üçün namizədlik dissertasiyası müdafiə etmişdir. Müdafiədən sonra baş müəllim, 1977-ci ildən dosent və 1991-ci ildən isə professor kimi fəaliyyət göstərmişdir. Polad Poladovun 50 elmi əsəri, 7 kitabı və bir neçə dərs vəsaiti çap olunmuşdur. O, 10-a yaxın elmi konfranslarda, kimya və biologiyanın xalq təsərrüfatına tətbiqi və s. problemlər üzpə məruzələr etmiş, materiallar çap etdirmişdir. Polad Poladovun elmi-pedaqoji fəaliyyəti 1981-ci ildə XII Mendeleyev qurultayının 2 medalı, "Gənc kimyaçılar" ümumittifaq olimpiadasının qalibi diplomu, "Sosializm yarışının qalibi" döş nişanı və 1988-ci ildə "Əmək veteranı" medalı ilə qiymətləndirilmişdir.

RƏŞAD QASIMOV

Rəşad Mehralı oğlu Qasımov 1956-cı ildə Bolnisi rayonunun Faxralı kəndində anadan olmuşdur. 1973-cü ildə Faxralı orta məktəbini ə’la qiymətlərlə bitirmişdir. 1973-cü ildə ADU-nun mexanika-riyaziyyat fakültəsinə daxil olmuş və 1978-ci ildə oranı müvəffəqiyyətlə bitirmişdir. 1978-ci ildə Azərbaycan EA Kibernetika institutunda baş laborant vəzifəsində işə başlamışdır.

BDU-nun "Ali riyaziyyat" kafedrasının dissertantı olmuş və 1996-cı ildə Azərbaycan EA Mexanika və Riyaziyyat institutunda "Qeyri-xətti hiperbolik tənlik üçün qeyri-requlyar qarışıq məsələnin həllinin apraksimasiyası" mövzusunda namizədlik dissertasiyası müdafiə etmişdir. 12-yə qədər elmi məqalənin müəllifidir.

Hal-hazırda ARDNŞ "Xarici sərmayələr idarəsində" şö’bə müdiri vəzifəsində çalışır.

RƏHİLƏ RAMAZANOVA

Rəhilə İlyas qızı Ramazanova 1969-cu il mayın 4-də Bolnisi rayonunun Faxralı kəndində anadan olmuşdur. 1985-ci ildə Faxralı orta məktəbini bitirmiş, Azərbaycan Neft və Kimya institutunun Geoloji kəşfiyyat fakültəsinə daxil olmuş və 1990-cı ildə həmin fakültədə təhsilini "Neft və qaz yataqlarının axtarışı və kəşfiyyatı" ixtisası üzrə fərqlənmə diplomu ilə başa vurmuşdur.

1990-cı ildə Azərbaycan Elmlər Akademiyası Geologiya institutunda əyani aspiranturaya daxil olmuşdur. 1994-cü ildən həmin institutda "Litologiya" ixtisası üzrə elmi işçi vəzifəsində işləmişdir. "Orta Kür çökəkliyinin təbaşir yaşlı süxurlarının postsedimentasion dəyişilməsi və onların kollektor xassələrinə tə’siri" mövzusunda namizədlik dissertasiyası üzərində işləmişdir.

1995-ci ildən Azərbaycan Neft və Kimya Elmi-Tədqiqat institutunda baş laborant vəzifəsində çalışmış, bir neçə məqalənin müəllifi olmuşdur. 1998-ci ildə ABŞ-nın (Texas ştatında) Hyüston şəhərində yerləşən Texas universitetinin geologiya fakültəsinə daxil olmuş, 1999-cu ildə fakültəni bitirmişdir. Həmin ildən Texas universitetinin geologiya fakültəsi üzrə magistratura şö’bəsində təhsil almış və dissertasiya müdafiə edib elmi dərəcə almışdır. İngilis, rus və Azərbaycan dillərində yaxşı tərcümə etmə qabiliyyətinə malikdir.

RÖVŞƏN XƏLİLZADƏ

Rövşən Sabir oğlu Xəlilzadə 1972-ci il martın 1-də Bolnisi rayonunun Faxralı kəndində anadan olmuşdur. 1979-cu ildə Faxralı kənd 8 illik məktəbinin 1-ci sinfinə getmiş, 1989-cu ildə isə Bakı şəhəri 53 saylı orta məktəbi qızıl medalla bitirmişdir.

Həmin ildə Azərbaycan Dövlət Tibb Universitetinə daxil olmuş, 1995-ci ildə isə fərqlənmə diplomu ilə Universiteti bitirmişdir.

1995-1997-ci illərdə Azərbaycan Tibb Universitetinin nerocərrahiyyə kafedrasının klinik ordinatoru olmuşdur.

1997-2000-ci illərdə aspiranturada oxumuşdur.

2000-ci ildə "Hemorrogik institutlarda cərrahi müalicənin proqnozları" mövzusunda dissertasiya müdafiə edib, tibb elmləri namizədi alimlik dərəcəsi almışdır.

Rövşən Xəlilzadənin elmi və pedaqoji fəaliyyəti 7 elmi məqalədə öz əksini tapmışdır.

Rövşən Xəlilzadə gənc mütəxəssis kimi 1 il xarici dövlətdə elmi e’zamiyyətdə olmuşdur.

Rövşən Xəlilzadə bu müddət ərzində bir neçə elmi-praktiki konfranslarda çıxış etmiş, məqalələr çap etdirmişdir.

Hal-hazırda Azərbaycan Tibb Universitetinin neyro-cərrahiyyə kafedrasının assistentidir

SABİR ÖMƏROV

Sabir Ömər oğlu Ömərov 1956-cı ildə Bolnisi rayonunun Faxralı kəndində anadan olmuşdur. 1973-cü ildə Faxralı kənd orta məktəbini bitirmiş və həmin ildə Azərbaycan Dövlət Universitetinin (indiki BDU) riyaziyyat fakültəsinə daxil olmuşdur.

Universiteti bitirdikdən sonra tə’yinatla Azərbaycan EA Kibernetika İnstitutuna göndərilmişdir. 1978-1980-cı illərdə həmin institutda mühəndis-proqramçı vəzifəsində çalışmışdır. 1980-1983-cü illərdə T.Q. Şevçenko adına Kiyev Dövlət Universitetinin "Ehtimal nəzəriyyəsi və riyazi statistika" kafedrasının əyani aspirantı olmuşdur.

1984-cü ildə "Təsadüfi proseslərin və meydanların interpolyasiyası haqqında" mövzusunda namizədlik dissertasiyası müdafiə edərək fizika-riyaziyyat elmləri namizədi elmi dərəcəsi almışdır.

1985-1990-cı illərdə Azərbaycan EA AİS şö’bəsində çalışmışdır. 1990-cı ildən Azərbaycan Dövlət Kənd Təsərrüfatı Akademiyasında dosent vəzifəsində işləyir.

Sabir Ömərov 4 dərs vəsaitinin, bir neçə metodiki tövsiyənin və 18 elmi məqalənin müəllifidir.

"Korrelyasiya və reqressiya təhlili", "Statistik fərziyyələrin yoxlanılması" adlı vəsaitləri nəşr edilmişdir.

SABİR XƏLİLOV

Sabir Ayvaz oğlu Xəlilov 1941-ci ildə Bolnisi rayonunun Faxralı kəndində anadan olmuşdur. 1958-ci ildə Faxralı orta məktəbini bitirmiş və həmin ildə Azərbaycan Politexnik İnstitutunun Mexanika fakültəsinə daxil olmuşdur. 1963-cü ildə həmin fakültədə təhsilinin fərqlənmə diplomu ilə başa vurmuşdur.

1965-ci ildən Azərbaycan Texniki Universitetində işə başlamışdır. 1974-cü ildə "İkiforsunkalı yanacaq sistemi vasitəsilə dizel mühərrikinin işinin tədqiqi" mövzusunda namizədlik dissertasiyası müdafiə edərək texnika elmlər namizədi elmi dərəcəsi almışdır. 1976-cı ildə "Daxili yanma mühərrikləri" kafedrasının dosenti olmuşdur. 1981-1985-ci illərdə Əlcazair respublikasının Yüngül Sənaye İnstitutunda işləmişdir. 1996-cı ildən Türkiyə Respublikasının Erciyəz Universitetində çalışır.

Daxili yanma mühərrikləri üzrə 30-dan artıq elmi əsərin müəllifidir.

SABİR İSGƏNDƏROV

Sabir Məhəmməd oğlu İsgəndərov 1941-ci il iyunun 10-da Bolnisi rayonunun Faxralı kəndində anadan olmuşdur. Faxralı orta məktəbini bitirmiş, 1960-cı ildə Azərbaycan Politexnik İnstitutuna daxil olmuşdur.

1965-ci ildə institutu bitirib Azərbaycan Dövlət su təsərrüfatı qurğuları layihələndirmə institutunda mühəndis hidrotexnik vəzifəsində işləmişdir. İşlədiyi müddətdə Novoçerkassk şəhərində mühəndis meliorasiya institutunun nəzdində su təsərrüfatı üzrə Ali rəhbər kadrları kursunu keçmiş, Uzaq şərqdə - Vladivostok şəhərində su təsərrüfatı qurğularının layihələndirilməsində müəyyən müddət çalışmışdır. 1969-cu ildə Azərbaycan Elmi-Tədqiqat Su Problemləri institutunun aspiranturasına qəbul olunmuş sonra Moskva Hidromeliorasiya İnstitutuna göndərilmişdir.

Aspiranturada oxuduğu zaman Moskva xalq universitetinin texnika və iqtisadiyyat kursunu bitirmişdir. Eyni zamanda Moskva Hidromeliorasiya institutunun Elmi-tədqiqat bölməsində də işləmişdir.

1973-cü ildə Moskva Hidromeliorasiya institutunda "Çay axımının mürəkkəb növ tənzimlənməsinin bə’zi məsələlərinin tədqiqi" mövzusunda namizədlik dissertasiyası müdafiə etmişdir. 1972-1974-cü illərdə Azərbaycan Elmi-Tədqiqat Su Problemləri institutunda su ehtiyatlarının kompleks istifadəsi laboratriyasında baş elmi işçi vəzifəsində çalışmışdır.

1975-ci ildən Bakı Dövlət Universitetinin Hidrometeorologiya kafedrasında dosent vəzifəsində işləyir. Tədrislə yanaşı təsərrüfat müqavilələri üzrə Lənkəran zonasında Viləşçay su anbarının gil ekranlı bəndinin tikilməsində Hidrometeoroloji amillərin nəzərə alınması, səthi axımın tədqiqi, Ceyranbatan su anbarında lillənmənin öyrənilməsi, Böyük Şor kölünün hidroloji rejimi və s. mövzularda tədqiqatların yerinə yetirilməsində rəhbər olmuşdur.

1976-cı ildə YUNESKO xətti üzrə Beynəlxalq hidrologiya kursunu bitirmişdir. 1995-ci ildən Lənkəran Dövlət universitetində və Bakı Ali Hərbi Dəniz məktəbində də işləmişdir. Fakültə "Bilik" cəmiyyətinin sədri və dekan müavini vəzifəsində çalışmışdır.

Sabir İsgəndərov 100-ə yxın elmi məqalənin, elmi hesabatın və bir sıra dərs vəsaiti və fənn proqramlarının müəllifidir. Onun apardığı elmi-tədqiqat işlərinin nəticələri respublikamızda, Orta Asiyada və Şimali Qafqazda həyata keçirilən bir sıra su təsərrüfatı tədbirlərinin aparılmasında istifadə olunur.

SƏRDAR QASIMOV

Sərdar Yusif oğlu Qasımov 1955-ci ildə Bolnisi rayonunun Faxralı kəndində anadan olmuşdur. 1973-cü ildə Faxralı orta məktəbini ə’la qiymətlərlə başa vurmuş və ADU-nun mexanika-riyaziyyat fakültəsinə daxil olmuşdur. 1978-ci ildə oranı bitirmiş və Azərbaycan EA Kibernetika institutunda baş laborant vəzifəsində işə başlamışdır. 1983-cü ildə Kibernetika institutunda hesablama riyaziyyatı ixtisası üzrə qiyabi aspiranturaya daxil olmuşdur.

1992-ci ildə Kibernetika İnstitutunda dissertasiya müdafiə etmiş, elmlər namizədi elmi dərəcəsinə layiq görülmüşdür.

Hal-hazırda Azərbaycan Dövlət Neft Akademiyasının tətbiqi riyaziyyat kafedrasının dosenti və Azərbaycan EA Kibernetika İnstitutunda baş elmi işçi vəzifəsində çalışır. 20-yə yaxın elmi məqalənin müəllifidir. O, bir sıra ittifaq və respublika konfranslarının iştirakçısı olmuş, elmi məqalələr çap etdirmişdir.

SÜLEYMAN QASIMOV

Süleyman Mehralı oğlu Qasımov 1961-ci ildə Bolnisi rayonunun Faxralı kəndində fəhlə ailəsində anadan olmuşdur.

1978-ci ildə Faxralı kənd orta məktəbini bitirdikdən sonra Azərbaycan Xalq Təsərürfatı İnstitutuna (indiki ADİU-nun) daxil olmuşdur. 1982-ci ildə həmin institutu fərqlənmə diplomu ilə bitirmiş, iqtisadçı ixtisasına yiyələnmişdir.

1982-ci ildə Neft Daşları, Neft və qazçıxarma idarəsində gənc mütəxəssis kimi əmək fəliyyətinə başlamışdır. 1982-ci ildən 1991-ci ilədək həmin idarədə mühasiblikdən baş mühasib vəzifəsinədək yüksəlmişdir. 1991-ci ildə Xəzərdənizneftqaz İstehsalat Birliyində, 1992-ci ildə Azərneft neft və qazçıxarma baş idarəsində baş mühasib vəzifəsində çalışmışdır. 1994-cü ildən indiyədək Dənizdə neft və qazçıxarma İstehsalat Birliyində baş mühasib vəzifəsində çalışır.

1996-cı ildə Azərbaycan Dövlət İqtisad İnstitutunun "Muhasibat uçotu və audit" kafedrasının dissertantı qəbul olunmuş, 2001-ci ildə "Mühasibat uçotu, nəzarət və təsərrüfat fəaliyyətinin təhlili" ixtisası üzrə "Dənizdə neft və qazçıxarma sənayesində idarəetmə uçotunun təşkili problemləri və tətbiqi istiqamətləri" mövzusunda dissertasiya müdafiə edərək iqtisad elmləri namizədi alimlik dərəcəsi almışdır.

Süleyman Qasımovun elmi fəaliyyəti 10 elmi əsərdə öz əksini tapmışdır. Bu müddət ərzində bir neçə elmi və elmi-praktik konfrans və simpoziumlarda çıxış edib, materiallar çap etdirmişdir.

ŞAMİL ORUCOV

Şamil Oruc oğlu Orucov 1929-cu ildə Borçalının Faxralı kəndində anadan olmuşdur. 1937-ci ildə Faxralı kənd orta məktəbinə daxil olmuş, 1948-ci ildə həmin məktəbi bitirmişdir. 1950-1953-cü illərdə hərbi xidmətdə olmuşdur. Tərxis olunduqdan sonra 1954-cü ildən 1957-ci ilə qədər Faxralı kəndindəki kitabxananın müdiri işləmişdir. 1954-cü ildə Azərbaycan Politexnik İnstitutunun "Avtomobil nəqliyyatı" fakültəsinə daxil olmuş, 1959-cu ildə həmin fakültəni bitirmişdir. Ailə vəziyyətilə əlaqədar olaraq Şamil Orucov institutda oxuduğu vaxt paralel olaraq Azərbaycan Dəmir yol İdarəsinin ambarında təchizatçı işləmişdir. 1959-cu ildən isə həmin müəssisənin təchizat və nəqliyyat şö’bəsində böyük mühəndis, 1961-ci ildə texniki şö’bənin mühəndisi işləmişdir. Şamil Orucov 1962-ci ildə Azərbaycan SSR Tikinti Nazirliyinin maddi texniki bazasında nəqliyyat şö’bəsinin rəisi vəzifəsini icra etmişdir. 1964-cü ildə Azərbaycan SSR EA-nın İqtisadiyyat institutunun aspirantı olmuşdur. 1967-ci ildə EA-nın İqtisadiyyat İnstitutununda kiçik elmi işçi işləmişdir.

1967-ci ildə dissertasiya müdafiə etmişdir. 1968-ci ildə Azərbaycan SSR Dövlət Plan Komitəsinin İqtisadiyyat İnstitutuna keçmiş və burada böyük mühəndis-iqtisadçı vəzifəsində işləmişdir. 1968-ci ilin sonunda Xalq Təsərrüfatı sahələrinin yerləşdirilməsi sektoruna müdir vəzifəsinə irəli çəkilmişdir. Həmin ildən də Azərbaycan Xalq Təsərrüfatı İnstitutunun iqtisadi planlaşdırma kafedrasına müqavilə yolu ilə müəllim düzəlmişdir. 1971-ci ildən 1997-ci ilə qədər Azərbaycan Xalq Təsərrüfatı İnstitutunda dosent vəzifəsində işləmişdir. 1983-cü ildə iqtisadiyyatın təşkili və planlaşdırılması kafedrasına müdir tə’yin olunmuşdur. Şamil Orucovun elmi və pedaqoji fəaliyyəti 35 elmi məqalədə və 3 kitabda, 17 tezis-məruzələrdə öz əksini tapmışdır. Bunlardan başqa 10 kitabı redaktə etmiş və bir neçə aspiranta elmi rəhbər olmuşdur.

Şamil Orucov 1997-ci ildə vəfat etmişdir.

VAQİF NƏBİYEV

Vaqif Nəbi oğlu Nəbiyev 1953-cü ildə Bolnisi rayonunun Faxralı kəndində anadan olmuşdur. 1970-ci ildə Faxralı orta məktəbini ə’la qiymətlərlə bitirmişdir. Elə həmin ildə Azərbaycan Dövlət Tibb İnstitutunun (indiki ADTU-nun) müalicə-profilaktika fakültəsinə qəbul olmuşdur.

1976-cı ildə institutu müvəffəqiyyətlə bitirmiş, bir il Kirovabad (Gəncə) şəhər təcili yardım xəstəxanasında internatura keçmişdir. 1978-1981-ci illərdə tə’yinatla Xanlar rayonu mərkəzi xəstəxanasında həkim-onkoloq işləmişdir. 1983-cü ildən şəhər onkoloji dispanserində endoskopiya şö'bəsinin müdiridir. Onun sə’yi nəticəsində endoskopiya şö'bəsinin bazasında şəhər endoskopiya mərkəzi yaradılmışdır. Hazırda həmin mərkəzə Vaqif Nəbiyev başçılıq edir.

Vaqif Nəbiyev 1990-cı ildə Leninqrad (indiki S.Peterburq) şəhərində SSRİ Səhiyyə Nazirliyinin S.M.Kirov adına Həkimləri təkmilləşdirmə İnstitutunun endoskopiya kafedrasının müdiri professor L.N.İnşakovun rəhbərliyi altında "Yemək borusu xərçənginin erkən diaqnostikasının təkmilləşdirilməsi yolları" mövzusunda namizədlik dissertasiyası müdafiə etmişdir.

15 elmi məqalənin müəllifidir. Onkologiya və endoskopiya üzrə tibbi kadrların hazırlanmasında xüsusi xidmətləri var. ATU-da, 2 saylı tibb məktəbində, orta tibb işçilərinin ixtisasartırma kursunda dərs deyir. Bakı şəhərinin baş endoskopistidir. Daxili qoşunlar hospitalının məsləhətçisi və endoskopistidir.

Doktorluq işini müdafiə şurasına təqdim etmişdir.

VƏLİ SULTANOV

Vəli Daryax oğlu Sultanov 1928-ci ildə Borçalı mahalının Bolus nümayəndəliyinin (indiki Bolnisi rayonu) Faxralı kəndində anadan olmuşdur. Orta məktəbi Faxralı kəndində bitirdikdən sonra, 1950-ci ildə Azərbaycan Sənaye İnstitutuna daxil olmuş və 1955-ci ildə Neft və qaz quyularının qazılması ixtisasına yiyələnmişdir. Bir müddət neft buruqlarında işləmiş, 1958-ci ildə "ÜİTTETİ-də" (ümumittifaq Təhlükəsizlik Texnikası Elmi Tədqiqat İnstitutu) çalışmışdır.

1968-ci ildə namizədlik dissertasiyası müdafiə etmişdir. Həmin ildən e’tibarən AzPİ-nin (indiki ATU-nun) əmək mühafizəsi və təhlükəsizlik texnikası kafedrasında dosent vəzifəsində işləmişdir. 1977-ci ildə xəstəliklə əlaqədar olaraq işdən azad edilmişdir. Vəli Sultanovun elmi və pedaqoji fəaliyyəti 20-dən çox elmi əsərdə öz əksini tapmışdır. O cümlədən iki kitabın müəllifi, 4 kitaba isə həmmüəllif olmuşdur. Vəli Sultanov 15-ə qədər ittifaq və respublika səviyyəli konfranslarda mə’ruzələr etmiş və elmi materiallar çap etdirmişdir.

Vəli Daryax oğlu Sultanov 1998-ci il iyun ayında Bakıda vəfat etmişdir.

YOLÇU ƏLİZADƏ

Yolçu Əhməd oğlu Əlizadə 1922-ci ildə Borçalı mahalının Bolus nümayəndəliyinin Faxralı kəndində anadan olmuşdur. 1946-cı ildə Faxralı orta məktəbini qızıl madalla bitirmiş, Azərbaycan Dövlət Universitetinin filologiya fakültəsinə daxil olmuşdur. 1941-ci ildə Böyük Vətən müharibəsinin başlanması ilə əlaqədar olaraq həmin ilin avqust ayında Ordu sıralarına çağırılmış, 1941-1945-ci illərdə ön cəbhədə vuruşmuşdur. Müharibədə iştirakı zamanı orden və medallarla təltif edilmişdir.

Müharibədən tərxis olunduqdan sonra, Azərbaycan Xalq Təsərrüfatı İnstitutuna daxil olmuş, 1956-cı ildə oranı bitirmişdir. 1946-cı ildən 1968-ci ilə kimi Bolnisi rayonunun bir sıra kəndlərində kolxoz və sovxozların baş mühasibi vəzifəsində işləmişdir. 1964-cü ildə Azərbaycan Kənd Təsərrüfatı İnstitutunun iqtisadiyyat fakültəsinə aspiranturaya daxil olmuş, 1968-ci ildə isə aspiranturanı bitirmişdir. Sonra Gürcüstan Elmlər Akademiyasının İqtisadiyyat İnstitutunda dissertasiya müdafiə edib iqtisad elmlər namizədi elmi dərəcəsi almışdır. 1968-ci ilin sentyabr ayının 1-dən 1999-cu ilin sentyabrına kimi Azərbaycan Dövlət İqtisad İnstitutunun mühasibat uçotu kafedrasında dosent vəzifəsində işləmişdir. 1969-1974-cü illərdə həmin ali məktəbin "Mühasibat uçotu və maliyyə-kredit" fakültəsində dekan müavini və dekan vəzifələrində işləmişdir. Mühasibat uçotuna və onun təkmilləşməsinə aid 35 elmi məqalənin və 3 dərs vəsaitinin müəllifidir. Bu sahə üzrə elmi konfranslarda fəal iştirak etmiş, məqalələr çap etdirmişdir.

1985-1990-cı illərdə Azərbaycan Ali məhkəməsinin iclasçısı olmuşdur. II dərəcəli müharibə əlilidir.

YUSİF MUSAYEV

Yusif Əli oğlu Musayev 1942-ci ildə Bolnisi rayonunun Faxralı kəndində kolxozçu ailəsində anadan olmuşdur. 1948-ci ildə Faxralı orta məktəbinin 1-ci sinfinə daxil olmuş və 1958-ci ildə orta məktəbi bitirib, Azərbaycan Politexnik İnstitutunun maşınqayırma fakültəsinə daxil olmuşdur. 1963-cü ildə institutu bitirmiş, tə’yinat üzrə "Bakelektroştamp" zavodunda mühəndis-texnoloq işləmişdir. 1964-1965-ci illərdə ordu sıralarında xidmət etmişdir. 1965-1968-ci illər ərzində Azərbaycan Politexnik institutunun "Maşın detalları və yükqaldıran-nəqlədici maşınlar" kafedrasında assistent işləmişdir. 1968-1971-ci illərdə Moskvada SSRİ EA-nın "Maşınşünaslıq" elmi tədqiqat institutunda aspirant olmuş, orada texnika elmləri namizədi elmi dərəcəsi almaq üçün dissertasiya müdafiə etdikdən sonra Azərbaycan Politexnik İnstitutunun "Maşın detalları və YQNM" kafedrasında assistent, baş müəllim və dosent vəzifəsində işləmişdir. 1975-1976-cı illər və 1998-ci ildə Almaniya Federativ Respublikasının Münxen Texniki Universitetində elmi e’zamiyyətdə olmuşdur. 1981-1982-ci illərdə Moskvada Moris Torez adına Xarici Dillər İnstitutunda ingilis dili öyrənmiş və 1983-1987-ci illər ərzində Efiopiyada Bahr-Dar Politexnik institutunda müəllim işləmişdir. O, maşın və mexanizmlərdə "Sürtünmə, yeyilmə və yağlama" problemləri ilə məşğuldur. 50-dən çox elmi məqalənin, 10-a qədər müəlliflik şəhadətnaməsinin müəllifidir. 9 dərs vəsaiti çap etdirmişdir (onlardan 4-ü ingilis dilində Efiopiyada çap olunmuşdur). Digər müəlliflərlə birlikdə rusça-azəricə-türkcə-ingiliscə "Makina elemanları sözlüyü" (325 s) Türkiyədə çap olunmuşdur (1997). Elmi məqalələri əsasən Rusiya, Almaniya, Türkiyə, Yuqoslaviya və s. dövlətlərdə çap olunmuşdur.